Tag: Kort verse

Vanoggend is ‘n pad in my woordetuin
‘n verbale kleurspel wat geil gedy
Die malvas bou lande al om die pot se rand
‘n paar sonneblomme toring woorde
in die sonlig se kant
Magrietjies in bont potte
Amarillas en clivias, petunias en viooltjies
rangskik reënboë teen die grondwalletjies
Namakwaland daisies, klein pienk rosies
geel krisante en geverfde irisse
hang herinneringe en sterre in mense se oë
die blommetaal breek sy koninkryk oop:
genadiglik, weelderig en hoopvol
in liefde se hand
want ons is almal gebreekte sonsoekers
in hierdie land
©Sonja Peacock